Сегодня на Выставке «Россия» ВДНХ состоялась встреча с нашими именитыми спортсменами!Наши спортсмены посмотрели на экспозицию в целом и выразили восхищение и гордость за нашу республику. Также они хотели напомнить о важности голосования за наш стенд.
«Россияның хостуг хүрешке чыынды бөлүү, Ставрополь крайның Кисловодск хоорайга март 1-ден 15-ке чедир, Олимпий оюннарынга белен турары-биле ээлчеглиг белеткелин эртип турган, белеткел эки эрткеш, чанып тарап турарывыс бо. Чанар дээш бир аэропортан бир аэропорт солуп тура «Чоннарның ажыл-ишчи чедиишкиннериниң делгелгезинде» (ВДНХ) төрээн черивистиң, чурттувустуң булуңун көөр сорулга-биле албан-биле мында келдивис. Кулак-биле дыңнаарының орнунга чаңгыс катап көргени дээре деп идиг-биле. Бистиң республикавыстың булуңу хөйнү хаара тудуп алган турары чоргааранчыг-дыр. Он-он кижилер узун одуруг тургузуп алган, ээлчег былаажып турары өөрүнчүг. Бис ам өөреникчим Начын-биле күчүлүг күрүневис — Россияның чыынды, интернационалчы бөлүүнде орус, дагестан, бурят, кабардин, якут, чуваш дээш хөй-ле янзы-бүрү чүдүлгелиг чоннар аразында эдержип, чурттап чоруур бис, чоннар-бүрүзүнүң культуразы солун база тускай. Бис чаңгыс черде чыглып, аралажып чугаалажып чоруур болгаш бисте удур-дедир сонуургажып айтырыг салчыр байдал бар. А оске кижилер? Олар чүгле тура четсе, интернет азы ном-сеткүүл таварыштыр сонуургап көөр апаар-дыр, ынчангаш бо мындыг хемчег болуп эртип турары дыка өөредиглиг, чырыдыышкынныг таныжылга, найыралдың база бир хевири деп санап тур мен. Биче-бүүрей чоннарның ажыл-ижин, агаар-бойдузун, ёзу-чаңчылдарын, ужурларын, хеп-сынының ылгалын танып, харын-даа, тудуп-суйбап болур хамаанчок, бодунга кедип алгаш балаттынмас сактыышкын кылдыр чурукка дыттырып алыры безин аас-кежик… Аът деп малывысты үнелеп, ооң дериин мөңгүн-биле шууткуп кылып чораанывыс хуулгаазын илби, «хааннарның шынаазында» базырыктардан тывылган каасталгаларны амгы сайзырыңгай үе-биле деңней бээрге кайгамчык-дыр, ада-өгбе, усчу-дарганнар ону эзилдирип билир чораанын бодап келирге чугле чоргаарал оттур. Өске регионнарда амгы сайзырал-биле мурнай базып алган видео, компьютер графиказы дээн ышкаш чаартылгалар хөйү-биле бар, ынчалза-даа, бисте шупту чүве холдан, бойдустан, салгалдан салгалче дамчып келген дириг өнчү. Сагыш-сеткилди сөге соп,келир ыяңгылыг хөгжүм херекселдери, эрес аңчының ча согуну, кызыл дыттывыс, аът малывыс чел, кудуруу, кежи. Хуулгаазын-дыр сен, Тывам! Бистиң чуртту, бистиң чонну улам танып билзин! А бистер аныяк-өскен улам бедиктерже көдүрээлиңер! Хүндүлүг чаңгыс-чер чурттугларымны, кожа-хелбээ чурттап чоруур кожаларыңарны, чаш ажы-төлүңерни эдертип алгаш кээрин кыйгырдым, келгеш магадап, чоргааралдың хей-аъдын улам оттуруп алырын күзедим. Ханы хүндүткел-била, Тыва республиканың алдарлыг тренери — Хомушку Алибек»
#выставкаРоссия #РеспубликаТыва #ПолпредствоТувы